مدونة ابحاث ودراسات " ترفض التمييز القانوني والاجتماعي ضد النساء "
تصويري ، نساء من مصر
تيجوا نتعرف ......... المدونه دي حصيله شغل طويل بدآته من سنين بعيده برومانسيه وقناعه ساذجه اني ممكن اغير الدنيا ، كنت متصوره ان تغيير قانون حيغير الدنيا ويعدل ميزانها المايل .. ولما كبرت وفهمت واتلطمت عرفت ان المشكله مش في القوانين لان وقت الجد الناس تركنها علي الرف وتديها ضهرها .. فهمت ان المشكله في عقول الناس لانها متستفه زي من مليون سنه جواها كل العادات وكل التقاليد وكل الاعراف وكل الانماط التقليديه وسنه ورا سنه اكتشفت ان تغيير عقول الناس وطرق تفكيرها هي اصعب من الصعب نفسه ومحتاجه وقت وطوله بال ومناهده وخناق ان لزم الامر و....... يمكن يمكن تتغير فيها حته صغيره قوي قوي ..... طب وبعدين ...... ولا قبلين ....... احنا نعمل اللي علينا والدنيا تتغير وقت ماتتغير براحتها ... احنا نسيب افكارنا علي البرديات وننتظر بكل الامل ان يآتي شخصا ما في لحظه ما ويقرآ ماكتبته - ولو بعد الف سنه - ويقول " مر علي هذا الوطن بعض المحبين بذلوا الجهد لتحسين احواله التي بقيت علي حالها رغم انوفهم ، مر علي هذا الوطن بعض المحبين اللذين عملوا بكل دآب وجديه وتركوا تراثهم للاجيال من بعدهم كنوزا من المعرفه خطوه اولي في طريق التغيير الطويل الشاق " وها انا اكتب وانشر واعمل مايتعين علي عمله لااكترث بما سيحدث غدا فرهاني ليس علي الغد الاتي بل علي المستقبل البعيد يآتي مشرقا عادلا ولو كره الكارهون ............
ليه اللون البنفسجي ؟؟؟؟؟؟؟
اختار العالم شرقه وغربه اللون "الازرق اللبني" لونا للذكوره الوليده !! واختار اللون "البمبه" لونا للانوثه الوليده!! ... لكن الحركه النسويه تمردت علي ذلك التقسيم النوعي للالوان وقررت خلط اللونين معا " اللبني + البمبه " فكان اللون " البنفسجي الفاتح " لونا للطفل الوليد ذكرا كان او انثي لا يهم ... انه لون الطفل الانسان بصرف النظر عن الاختلاف البيولوجي ......
الاثنين، 4 فبراير 2013
تحرش جماعي من حيوانات مجرمين !!!
ده فيديو موجع جداااااااااااااااااااااااا
في ميدان التحرير ، وحوش مجرمين ، مؤجرين متسلطين ، واخدين تعليمات حقيرة منحطه للتحرش بالبنات اللي بتنزل التحرير ، علشان يقطعوا رجل البنات من التحرير ... ده مش تحرش جنسي دوافعه جنسية ، ده عمل اجرامي سياسي حقير خطير ، بنات بتتخطف وبنات بتتضرب بالسكين في اعضاءها التناسليه ، بنات بتتخنق بالكوفيات اللي لابسينها ، بنات نزلت التحرير وهي عايزه تشارك في صناعه مستقبل وطنها ، اتلم عليها بلطجيه مجرمين مؤجورين علشان يقطعوها بدنيا وجنسيا ويلبسوها العار ...
ده فيلم حقيقي ، مش فوتوشوب ، مش خديعه ، دي جريمه سياسيه خطيره حقيره !!!
تصدوا للمجرمين المتحرشين ، ودافعوا عن حق البنات والستات في ميدان امن ومشاركه سياسيه حقيقيه !!!!
هذه المدونه محمية " اسم وعنوان ووصف ومضمون وكل ماهو منشور فيها" بقوانين الملكيه الفكريه .. لايجوز نقل اي من المنشور فيها او نشره في اي موقع اخر او جريده او كتاب دون الموافقه الكتابيه من صاحبة المدونه .. اي مخالفه لذلك تعرض صاحبها للمساءله القانونيه .....
ليست هناك تعليقات:
إرسال تعليق